Сафари кори президент ба нохияи

Имрӯз, 27 апрел, Пешвои миллат, Президенти ҷумҳурӣ Эмомалӣ Раҳмон бо сафари корӣ ба шаҳри Нораки вилояти  Хатлон сафар кард.

Сарвари давлат нахуст дар расми мавриди истифода қарор додани муассисаи таҳсилоти миёнаи умумии №10 дар деҳаи Чашмаи ҷамоати деҳоти Дӯконӣ иштирок кард. Мактаб бо харҷи 2 миллион сомонӣ аз ҷониби соҳибкори маҳаллӣ Муҳиддин Табаров бунёд гардида, аз ду ошёна ва 14 синфхонаи таълимӣ иборат аст. Дар ин муассисаи таълимӣ 240 нафар толибилм дар як баст ба таълим фаро гирифта шуда, синфхонаҳои барҳавои омӯзиши забонҳои хориҷӣ, маркази ҳунаромӯзии духтарон, синфхонаи компютерӣ, толори маҷлисгоҳ ва ошхонаи замонавӣ дорад.

Сипас, Президенти мамлакат бо фаъолияти Корхонаи воҳиди давлатии «Маҷмааи гармхонаҳои доимоамалкунанда» шинос шуд. Маҷмааи гармхонаҳои шаҳри Норак соли 1982 бунёд гардида, дар замони истиқлолият пурра мавриди таҷдиду азнавсозӣ қарор гирифтааст. Масоҳати умумии маҷмаа 12 гектар буда, асосан дар 6 гектари он, ки шаш гармхона бунёд шудааст, сабзавоти барвақтӣ, аз қабили помидор, бодиринг, қаламфӯри булғорӣ, карам ва кабудиҳо парвариш карда мешавад. Гуфта шуд, ки дар мавсими имсола деҳқонон аз шаш гармхонаи мавҷуда ҳудуди 100 тонна сабзавоти барвақтӣ, аз ҷумла 69 тонна помидор, беш аз 3,5 тонна бодиринг ва 5 тонна дигар намуди маҳсулоти кишоварзӣ ҷамъоварӣ карда, бо нархи дастрас барои фурӯш ба бозор бароварданд.

Роҳбарияти Корхонаи воҳиди давлатии «Маҷмааи гармхонаҳо»-и шаҳр ба Сарвари давлат Эмомалӣ Раҳмон иттилоъ доданд, ки то охири мавсим ин нишондод дар маҷмуъ ба 250 тонна расонида мешавад, зеро ба ҳисоби мутахассисон ҳосили интизорӣ аз ҳар як гамрхона ҳудуди 28 тоннаро ташкил медиҳад. 

Маҷмааи гармхонаҳо дорои шабакаи ягонаи гармидиҳӣ мебошад, ки аз замони ба кор оғоз кардан тариқи қувваи барқ фаъолият мекунад. Тибқи нақшаи тарҳрезишуда дар ояндаи наздик дастгоҳҳои буғхонаи маҷмааи гармхонаҳо мавриди таҷдид қарор хоҳанд гирифт. Ба гуфти деҳқонон хароҷоти қувваи барқ имрӯз арзиши маҳсулотро боло мебарад ва онҳо гузаштан ба сӯзишвории алтернативӣ, аз ҷумла ангиштро ба манфиати кор медонанд.

Деҳқонони ин гармхонаҳо дар баробари таъмини бозори дохилӣ, ҳамчунин сабзавоти тару тозаи кишоварзӣ, аз ҷумла помидору бодирингро ба Федератсияи Руссия содирот мекунанд.

Бо иштироки Президенти мамлакат дар маҳаллаи «Сари гузар»-и ҷамоати деҳоти Дуконии шаҳри Норак Гимназияи давлатии рақами 1 ба фаъолият оғоз кард. Корҳои сохтмонӣ дар гимназия бо гузоштани санги асос аз ҷониби Пешвои миллат соли 2013 оғоз гардида, бо харҷи 30 миллион сомонӣ дар зарфи се сол сохта шуд. Бинои мазкур барои 360 ҷой пешбинӣ шуда, бо тамоми ашёи хониш таъмин гардидааст. 6 кабинети муҷаҳҳази техникӣ, 11 синфхона, китобхона, толори варзишии замонавӣ, ошхона барои 92 ҷойи нишаст ва кабинети таълимии ҳунарҳои мардумӣ ба хонандагону устодон пешкаш карда шуд. Инчунин, дар саҳни ҳавлии гимназия майдони футбол, волейбол, теннис бо стандартҳои байналмиллалӣ бунёд гардидааст.

Баъдан Сарвари давлат ба Неругоҳи барқи обии Норак ташриф оварда, муҳимтарин қисмати ин иншооти стратегӣ – дастгоҳи тақсимкунандаи пӯшидаи элигазии 500 кВ-ро мавриди баҳрабардорӣ қарор дод. Сохтмони бинои дастгоҳи тақсимкунандаи пӯшидаи элигазии 500 кВ-и НОБ-и «Норак» соли 2012 дар асоси дастуру супоришҳои бевоситаи Президенти Ҷумҳурии Тоҷикистон Эмомалӣ Раҳмон оғоз ёфта буд. Масоҳати ҷойгиршавии дастгоҳ, ки дар солҳои аввали баистифодадиҳии ин иншоот 4,5 гектарро ташкил медод, айни замон ҳамагӣ дар 0,10 сотих замин ҷойгир карда шудааст. Ба ғайр аз сарфаи масоҳати замин, инчунин ин таҷҳизот дигар афзалиятҳоро доро мебошад, ки аз эътимодияти баланд ва кафолати 25-сола иборат аст.

Пешвои миллат, Президенти ҷумҳурӣ Эмомалӣ Раҳмон, ҳамчунин, мактаби миёнаи таҳсилоти умумии рақами 28-ро дар вазъияти тантанавӣ ифтитоҳ кард. Мактаб сеошёна буда, барои 1220 хонанда дар ду баст пешбинӣ шудааст. Муассисаи таълимӣ аз 22 синфхона, 8 кабинети фаннӣ, аз ҷумла технологияи иттилоотӣ, лингофонӣ, химия, физика, математика, биология, толорҳои суруду мусиқӣ ва китобхонӣ, толори варзишӣ, маҷмааи майдончаҳои варзишии футбол бо 700 ҷойи нишаст, теннис, 2 майдони волейбол, баскетбол, ошхона бо 120 ҷойи нишаст, китобхона ва бунгоҳи тиббӣ иборат мебошад.

Мактаб инчунин дорои системаи алоҳидаи барқу гармидиҳӣ, аз сӯхтор нигоҳдоранда, хати алоқа ва дастгоҳи махсуси идоравӣ мебошад. Таҷҳизоти кабинетҳои фаннӣ ва ошхона аз ҳисоби маблағҳои Мақомоти иҷроияи маҳаллии ҳокимияти давлатии шаҳри Норак харидорӣ шудааст ва ба талабот ҷавобгӯ аст.

Баъди шиносоӣ бо шароити таълим дар муассисаи наву замонавии мактаби миёнаи таҳсилоти умумии рақами 28 дар ҳамин ҷо Пешвои миллат, муҳтарам Эмомалӣ Раҳмон бо устодони мактаб ва фаъолони шаҳр суҳбат кард. Президенти мамлакат нахуст ҳозиринро бо ифтитоҳи мактаби нав табрику таҳният гуфта, бунёди мактаб ва дигар иншооти имрӯз дар шаҳри Норак мавриди баҳрабардорӣ қарор додаро тӯҳфаи арзанда ба мардуми меҳнатқарини шаҳри Норак дар соли таҷлили 25-солагаии Истиқлолияти давлатии Тоҷикистон маънидод кард.

Сарвари давлат Эмомалӣ Раҳмон дар як мавзеи хушбоду ҳавои соҳили дарёи Вахш Истироҳатгоҳи замонавии “Пули Сангин”-ро ифтитоҳ кард. Истироҳатгоҳ дар ҷамоати деҳоти Пули Сангин дар майдони 4 гектар бунёд шуда, бо беҳтарин шароити истироҳату фароғат барои шаҳрвандони мамлакат ва меҳмонон аз хориҷи кишвар пешбинӣ шудааст.

Истроҳатгоҳ бо маблағи беш аз 10 миллион сомонӣ бо 60 ҷойи нави корӣ бунёд шуда, аз қабулгоҳ, бинои меҳмонхона бо 20 ҷойи хоб, ҳавзҳои шиноварӣ, 3 бинои истиқоматӣ, толори маҷлис, ошхона, айвонҳои истироҳатӣ дар соҳили дарё, майдончаҳои варзишии футбол, волейбол, баскетбол, тенниси калон ва тенниси рӯйи миз, толори саққобозӣ, ҳаммом, мотосиклҳои гуногунҳаҷми обӣ, мошинҳои хурди барқӣ барои ҳаракат дар ҳудуди истироҳатгоҳ, ипподром бо аспҳои зоти хурд ва аробаҳои махсус, майдончаҳои бозии кӯдакон ва дигар марказҳои дилхӯшӣ иборат мебошад. Хонаҳои истиқоматии истироҳатгоҳ мутобиқ ба талаботи меҳмонхонаҳои замонавӣ бунёд шуда, дорои шароити мусоиди зист ҳастанд.

Сарвари давлат ба соҳибкор Абдурасул Муҳидов, ки истироҳатгоҳро сохтааст, барои ин иқдоми созанда баҳои баланд дод. Президенти мамлакат ҳамчунин дастур дод, ки дар оянда барои ҷалби ҳарчи бештари сайёҳони хориҷӣ аз имконоти мавҷуда пурсамар истифода баранд.